سوسوز دنيز..

گؤرمه ميشديك بو گونه جن

بير دنيزين بوغولماغيني

زنجيرله ييب قانادلاييب آل قانيني يايماغيني

قوينونداكي دورنالارين ايتگين دوشن سورگونلرين

دوزلو بورانليقلارين داغ دره يه يايماغيني

بير دنيزين بوغماغيني!

سينه سيندن يول دوشر كن دوشگون اولود جوشار دنيز

سدلر ووروب جان آلديلار دادلي دوزلو دنيزيمدن

ائله بيل كي قان آلديلار او آل ياناق بنيزيمدن

اينصافسيزجا باييرلادي غم كدردن ساچ آغاردي

دنيز كؤكوندن لاخلادي

سوسوزلوقدان دوزلاقلادي

قهر ائدر كن دوزلو بوران ياتدي باغا

سولدو گوللر باغدان باغا

دوز الندي يارپاقلارا

بوغدالار دا گؤيره مه دي

قهرلنيب جوجرمه دي

تام اكينلر بئجرمه دي

آمما آذربايجان دنيزينده قئيرت واردير سانا گلمز

ائللري تك هئچ تؤكنمز

غم،كدري چكه-چكه، چاناقجادا سويو اولسا

زنجيرلنميش بوغازيندان باغيراجاق دؤنه-دؤنه

آخار چايلار دؤنسون سئله

قودرت وئرسين اونا بئله

دالغالانسين گوله-گوله

يئنه گئجه آي باغريندا دالغالانيب يئرييه جك

سويو كسن ميرآب گؤروب چورويه جك

چورويه جك!

رقيه علي قليان (لاله)

آفتاب آذربايجان درگيسيندن فايدالاناراق

آغ ايشيغين محبت چالاري

عؤمور معناسي.

قلبين آيناسي.

باهاسي و ساتيش مئيداني اولمايان،وار.

كؤنلون دينله ديگي ماهنيلار.

تك بير قلبين قاپيسينا دوشن آچار،

آنلايان،دويان

اينسان.

آزادليغي سس له ييرم..

سنه يازيرام..

سايين «پ» بيلميرم نئته گليرسن يا يوخ؟..

بيلميرم نئته الين چاتير يا يوخ؟..

آما منيم بوندان آرتيق يولوم يوخويدو...

داريخيرام سنه.. بيليرسن مي؟..

ياديندا كئچن ايل؟ ياديندا آخشام لار؟ ياديندا او قه در گليرديم گؤروشونه كي اؤزومده اوتانيرديم؟

....

آما نه ايله مك بو داريسقال شهرده بير سن وارييدين بيرده منيم داريخمالاريم..

ايندي منيم سئودالاريم بوتونلوكجه سنه دؤنور، من بوتون منليگيم له سنه داريخيرام.

 سنين يولونو ايزله ييرم..

بس سن هاردا قالدين؟... آخ... يازيخ من.. يازيخ من كي بيلمه دي سني بو تئزليگه ايتيره جك،

 يوخسا هر گون گؤروشونه گلردي.. هر گون بير آز تئز گليب گئج گئدردي..

سايين«پ» بو من سنه داريخير، هئچ بير كيمسه سي يوخدور كي سندن خبر آلسين..

هئچ بير يولدان سنين ايزيني آلا بيلمير.

گئتديك جه خسته خانانين حه يه تي يوخ كيتابلاري دا سنين قوخونو وئرمير...

سايين «پ» بيليرم اوره يين منه داريخير، بيليرم سنده مني اؤزلورسن. سن كي بيليرسن من هاردايام،

بس ندن مني تاپميسان؟؟ ندن..؟؟؟؟

بيرليك

ايستييرم وارليغيمي ترك ائدم

دونيادا كي تانيشلاريمدان ايتم

اؤلم، اؤلم، بيرده سونرادان بيتم

يول گئديرم يوللار حاصار اولوبدور

يولبير لريم مندن آيري دوشوب دور

هاچانسادير  هئي اورگيم  داريخير

اوزاق ليغين منيم  كونلومو سيخير

سن گلميرسن، منيم ده جانيم چيخير

گل اورگي يارديم ائله يولداش اول

گل بيرلشك، سنده منه قارداش اول

بير عوموردور منيم  حاليم  ياماندير

جانيم  يارا،  پالتاريم  دولــو  قانديـر

كيمه نه وار..كيم دئييركي جاوان دير؟

گلن  وورو  اورگيمـه   قـان   يـارا

هارا گئديم؟ اؤز اؤلكه مدن من هارا؟

دونيا  منيم  شئعيرلريمي  يانديريب!

يانديريب هئچ، بوش دفتريمي جيريب!

دويمويوب دور قلمي مي  سينديـرب!

ايندي  منه  دونيا بوتون  ساواش دير

گئجه گوندوز گؤزلريم دولو ياش دير

ايندي مني فلك ساليب دوستاغا

يابانجي ني قويوب منه  به ي آغا

ايسته ييرم  قالخام   بيرده  آياغا

گل بير اولاق  بو دونيـادا  ياشايـاق

اؤلكه ميزي  ياد  الينـده  قويمـوياق

قورخما

بو ماوي گؤي آلتيندا يانان آل گونشين

و اوفوق لاردا گولن آل شافاغين

سؤنمه يه جك

ائي منيم شانلي ائليم!

حرّ وطنيم،

آل گونشيم

گؤزگو تك پارلاق اوفوق

دريا كيمي چرخ اثير

ائي قادين لار،آنالار!

بيرجه آچين پنجره ني

صوبح آچيلماقدادي

صوبحون يئلي داغلاردان اسير.

اولو تانريم



بوتون كيمسه سيزلرين،كيمسه سي تانريم
آجي چكن لرين تكجه وفاسي تانريم
گرچك عاشيق لرين سئوداسي تانريم
آليزلرين،بيرجه دواسي تانريم
عاريف لرين هر چاغيندا اولان قانادي تانريم
اوشاقلارين قهرمان اويونجاغي تانريم
آتا-آنالارين بالالارينين سيغيناجاغي تانريم
اينسانلاري دار گوندن قورتاريجي سي تانريم
سوچلولارين اوره يينه اومود وئريجي تانريم
وفاسيز آدام اوغلونا وفا ائديجي تانريم
                         بيزلري بير آن اؤز باشيميزا بيراخما تانريم..

يازار: ائلمان اورمو اوغلو