دايان،يارديم ايسته يير بو قادين!

شهرين كمر يولوندان كئچنده گونده او ياشماقلي و اوزونو اؤرتموش ياشلي قاديني گؤروردو،چوخ راحاتسيز ائديجي بير آن اولوردو،بئلي آزجا بوكولموشدو و الين اللره آچميشدي..

ائلمان اوركدن آه چكيب تانريدان اونا يارديم ايسته دي،اونا ياخينلاشيب،آراباني ساخلاييب،شوشه ني اينديريب،آزجا پول وئريب؛نه نه تانريم سني قوروسون،منه ده دوعا ائت دئدي!

ياشلي قادين؛اوغلوم!عؤمور بويو ساغلام ياشاياسان،تانري سني ساخلاسين،ايجاره ائوده اوتورورام و كيمسه م يوخ...

ائلمان ده ريندن آه چكيب حزين باخيشلا اونلا آيريليب يولونون آردين توتدو..

يازار:ائلمان اورمو اوغلو

...نئچه گوندن سونرا آتا اولوردو،گئجه ساعات اون بيريدي و يوخوسو گلميردي،آروادي ايسه شيرين يوخويا قاچميشدي.آراز اوره يينده تانريلا دانيشيردي:

تانريم سندن ساغ-سالانات بير اوشاق ايسته ييرم،اؤزون بيليرسن منه قيز-اوغلان هئچ فرق ائتمير و يالنير ساغلام اولماغي بيزه يئترليدير..

ايكي گون او اضطرابلي گئجه دن اؤتموشدو و آراز ايش باشيندايدي،جيب تئلفونو زنگ چالدي،آناسينين سئوينج سسيدي:

آراز! اوغلوم،تئز آزربايجان خسته ائوينه اؤزونو يئتير،آتا اولورسان!

بير آتا اوچون،بونداندا خوش بير خبر اولورمو؟!

گؤزلمه زاليندا بويان- اويانا گئديردي، خانيم دوكتور عمل اوتاغيندان ديشاري چيخيب و آتا اولماق خبريني آرازا وئردي،سئوينجيندن هارار چكيب تانريدان تشككور ائتدي..

اوچ آي او گوندن كئچميشدي و كؤرپه نين سيجيللي سي آلينماميشدي،بير يانداندا هامي آرازلا ساواشا قالخيب تئز بير آد سئچ سيجيللي آل دئييردي،آما آراز اؤز ايسته ييندن واز كئچميردي و اؤزوم ايسته ديگيم آدي قوياجاغام دئييردي..

سونوندا اؤلكه نين باش كنديندن سونونجو مكتوب گلدي و آراز ايكينجي كز اولاراق آتا اولماغينا سئوينيب گؤيلره اوچدو،اونون وئرديگي آد قبول اولونموشدو و اوچ آيليق كؤرپه نين ايني كيمليگينده آدي يازيلاجاغيدي و اودا آراز دئين آد؛ائلمان..

يازار:ائلمان اورمو اوغلو

...آرواد واللاه يوخومدو،هله آيليغيمي آلماميشام دئيه، ائودن ائشيگه چيخدي.ائولريندن ايشلديگي فابريكايا گئتمه يه خيياوان باشينداكي دوراقدا دوروب ماشينا مينيب شيركته يوللاندي.

سئرويسده اؤز- اؤزونه دئيينيردي.فابريكايا يئتيشيب ايش يئرينه كئچدي.او پروفيل بوروسونون فابريكاسيندا چاليشيردي.نئچه ساعات چاليشاندان سونرا يولداشلارينين بيري يانينا گليب نئچه دقيقه بئينيني يئيندن سونرا، يوز مين تومن منه پول وئر ،دئدي.

يازيق كيشي چاشيب حئيران قالدي.جيبده پول يوخ،آروادلا ساواشيب،بورج ايچينده قرق ،اينديده امكداشي بوندان پول ايسته ييردي.يئنه آندا-ماند ائديب،بير قيران پولوم يوخدور دئدي و امكداشدا راحاتسيز اولوب گئتدي.

شيركت ساعات 10 دا سحر يئمه يي(صبحانه)وئريردي.ساعات دوز اون اولموشدور.اوبيري امكداشلاريلا بيرليكده آش ائوينه (آشپزخانا) دوغرو گئتدي.ماسا باشيندا ايلشيب بير آز آرخايينچيليقلا يئمه يه مشغولويدو،ائله يئمه يين شيرين يئرينده شيركتين ساتيش ائوينين (فروشگاهين) سوروملوسو (مسئولو) بونون يانينا گليب بئله دئدي: بي قارداش بورجون ساتيش ائوينه 300 مينه يئتيشديگينه گؤره و سنين بو بورجو واختيندا وئرمديينه گؤره دئميشم ياريسين بو آيين آيليغيندان چيخسينلار.بونو دئييب گئتدي.قيدا (غذا ) بوغازيندا قاليب آز قالدي بوغولسون.يئمه يي ياريدا قويوب ايش يئرينه قاييتدي.

ايداري واخت قورتولاناجاق بير كيمسه ايله دانيشمادي.آخي نه ائيله سين آلديغي 400 مي تومن آيليغيدي اونوندا 150 مين تومنين ساتيش ائوي بورجونا چيخاجايديي.

يورقون-آرغين قاپيني آچيب ائوه كئچنده آروادين آغلاماسين گؤردو.نه اولوب آي آرواد دئيه-دئيه،اوتاغا گيردي.آرواد بير كيشي يه باخيب اوشاغا باخيب بئله دئدي:

آي كيشي نه جور دئييم اوشاق 3 دانا درسده تجديد اولوبدو و ...نه جور دئييم،بيلدير آلان بوز دولابي (يخچال) ائله بيل گئجه يانيبدير و پولوموز باتيبدي!!!

يازار: ائلمان اورمو اوغلو